Skema e re e pensioneve, si ndryshojnë kushtet e përfitimit pas 1 janarit

Efektet e skemës së re të pensioneve do të ndihen edhe në vitet kontributeve, që duhen plotësuar për të përfituar pension të plotë. Gjatë kë...

Efektet e skemës së re të pensioneve do të ndihen edhe në vitet kontributeve, që duhen plotësuar për të përfituar pension të plotë. Gjatë këtij viti, skema e re parashikon që “portofoli” i sigurimeve të vijojë të rritet me 4 muaj - nga 36 vite që ishte të shkojë në 36 vite e 4 muaj. Por kjo nuk vlen vetëm për gratë, por edhe për edhe për burrat. Për të marrë pension të plotë, ata duhet të plotësojnë dy kushte: së pari moshën 65 vjeç, e cila nuk ndryshon deri në vitin 2032, dhe së dyti, vitet e kontributeve, përkatësisht 36 vite e 4 muaj.

Reforma e ndërmarrë në fushën e pensioneve synon rritjen progresive të moshës dhe sigurimeve për t’u finalizuar në vitin 2052, ku si për grate, edhe për burrat mosha e daljes në pension do të jetë 67 vjeç, ndërsa vitet kontributive do të bëhen 40.

Gazeta “Panorama” zbardh skemën e plotë të pensioneve dhe pasqyrimin e saj duke nisur nga 1 janari.

Pensioni i reduktuar
Mosplotësimi i moshës së duhur, pra, 65 vjeç, për burrat dhe 60 vjeç e 8 muaj për gratë, ndikon negativisht në masën e pensionit. Ligji e parashikon si “pension i reduktuar” dhe përfitohet deri në tre vjet përpara plotësimit të moshës për pension pleqërie, me kusht që kërkuesi të këtë plotësuar 36 vite e 4 muaj periudhë sigurimi, si dhe nuk kryen veprimtari ekonomike si i punësuar, punëdhënës ose i vetëpunësuar. Sipas ISSH-së, pensioni i reduktuar është pjesë e pensionit të plotë dhe mbetet i reduktuar gjatë gjithë kohës së përfitimit, pra, kur plotëson moshën për pension pleqërie, ai nuk ndryshon. Sipas ligjit, ky pension, për çdo muaj që kërkon ta përfitosh më herët, reduktohet me koeficientin 0.6 për qind. Pra, nëse e kërkon 36 muaj më parë, është 0.6 x 36 = 21.6% më i ulët nga masa e pensionit që pensionisti do të përfitonte në momentin e plotësimit të moshës. Ndërkohë, periudha minimale e sigurimit apo viteve të punës nuk ndryshon, mbetet 15 vite. Kontributet vullnetare janë një opsion për të rritur masën e përfitimit.

Skema
Skema e re e pensioneve, që ka nisur të aplikohet që nga 1 janari 2015, ka hequr konceptin e pensionit tavan. Pas miratimit të ligjit të ri, masa e pensionit varet nga kontributet e derdhura. Kjo nënkupton që sa më shumë vite dhe sa më e lartë të jetë paga e deklaruar, aq më e lartë do të jetë edhe masa e përfitimit. Ndërkohë, shuma bazë për efekt të kalkulimit fillestar të pensioneve do të jetë 7 064 lekë në muaj, pas indeksimit të bërë një vit më parë.