Emri/ 2 ton drogë me skaf drejt Italisë, ky është shqiptari anëtar i rrjetit të fuqishëm të drogës

Policia italiane ka zbuluar emrin e njërit prej 4 shqiptarëve të arrestuar këtë të hënë pas një operacioni të Guarda si Finanzas në Detin Ad...

Policia italiane ka zbuluar emrin e njërit prej 4 shqiptarëve të arrestuar këtë të hënë pas një operacioni të Guarda si Finanzas në Detin Adriatik, ku sekuestruan 2 ton marijuane në një mjet lundrues.

Bëhet fjalë për Saimir Çarkun, i cili ka rënë në prangat e policisë italiane.

I riun nga Kajava është emër i njohur për policinë shqiptare, pasi ishte person në kërkim me vendim të Gjykatës së Krimeve të Rënda i dyshuar si anëtar i një rrjeti të fuqishëm droge, trafikantësh të lëndëve narkotike.

Atij i ishte dhënë masa "Arrest me burg" si person i përfshirë në një rrjet kriminal dhe gjithashtu pjesë e episodit të datës 14 korrik 2017 në Bago të Kavajës ku u sekuestrua një sasi prej 1360 kg hashash.

Identitetet e tre shqiptarëve të tjerë që kanë rënë në pranga nuk janë bërë ende me dije.

Lënda narkotike me burim Shqipërinë ishte destinuar të trafikohej në shtetin fqinj.

Ngjarja e 14 Korrikut 2017
Asokohe u tha se droga ishte ndarë në dy automjete dhe gjatë kërkimeve në “Plazhin e Gjeneralit” u zbulua dhe skafi me të cilin do të trafikohej sasia e madhe e lëndës narkotike drejt shtetit fqinj.

Në pranga përfunduan Kejvi Hajdari, djali i ish-shefit të krimeve në Gramsh, Artur Hajdari, Ronald Hysenbelliu, Aristotel Kasaj dhe Arvis Muça, por ky i fundit u lirua me vonë.

Nga hetimi i prokurorisë, si anëtarë të këtij grupi kriminal u identifikuan dhe katër persona të tjerë, mes tyre edhe Çarku, të cilët u shpallën në kërkim me vendim të gjykatës për Krime të Rënda.

Me metodat specialet të hetimit, prokuroria mundi të “kryqëzonte” të dyshuarit, pasi siguroi ndaj tyre, prova të shumta fajësie.

E ndërsa prokurori Dritan Prenci po vijon hetimet për të hedhur dritë mbi të gjithë aktivitetin kriminal të grupit.

Saimir Çarku përfundoi në pranga gjatë operacionit me të fundit antidrogë të Guardia Di Finanza.

Lidhur me këtë operacion, mediat italiane raportuan se lënda narkotike ishte ngarkuar në një mjet lundrues në Shqipëri dhe kishte destinacion tregun italian. Operacioni u zhvillua gjatë natës në det, dhe pas disa minuta ndjekje, autoritetet italiane arritën të bllokonin mjetin pranë Salentos.

Përveç sasisë së madhe të drogës, 4 shqiptarëve iu sekuestrua edhe një kallashnikov.

Katër të dyshuarit, ku deri më tani është mësuar vetëm identitetit i njërit prej tyre, konkretisht i të shumëkërkuarit Saimir Çarku, do të përballen me drejtësinë italiane për trafik ndërkombëtar të lëndëve narkotike.