E shtuna e pastave: Dreka anullohet nëse kjo pjatë s'është në tavolinë!

Nëse ka ndonjë ushqim nga i cili, nuk e di nëse do të heqë dorë ndonjëherë apo nuk do ta shijoj ashtu siç e shijoj, janë makaronat. Për mua,...

Nëse ka ndonjë ushqim nga i cili, nuk e di nëse do të heqë dorë ndonjëherë apo nuk do ta shijoj ashtu siç e shijoj, janë makaronat. Për mua, nuk ka rëndësi nëse janë spageti apo pene, pacheri apo papardelle. Mjafton të jenë makarona me një salcë të shijshme.

Por , nuk doja që të sillja një recetë të thjeshtë, apo të konsumuar shpesh nga ju. Ndaj vendosa për “Spageti Puttanesca” (spageti putaneska) , e cila në shqip do të thotë ….oo lëre fare. Besoj se e dini kuptimin e kësaj fjale. Një pjatë italiane, shumë e shijshme dhe nuk do t’ju harxhojë më shumë se 20 minuta për tu përgatitur. Përbërësit kryesor për këtë recetë janë domatet , kaperi, ullinjtë, acuget dhe borziloku. Mua më pëlqen ta bëj pak djegesë duke shtuar pak fara të specit djegës , por jo mund të shtoni rigon ose piper të zi. Është zgjedhja juaj. Gjithashtu , unë kam preferuar të përdor ullinjtë e zinj por ju mund të përdorni jeshilë ose një përzierje të të dy llojeve.

Pra , dhe një herë. 20 minuta. 8 përbërës dhe një drekë apo darkë super e shijshme. Paturpësisht e shijshme. Siç ka emrin.
Përbërsit për 4 persona:
500 gr spageti
700-800 gr domate të prera në kubikë
170 gr ullinj të zinj të prerë në copa
4-5 acuge në vaj
70 gr kaperi në uthull ose kripë
3-4 thelpinj hudhre të prerë imët
4-5 fleta borzilok i freskët
Fara speci djegës
Vaj ulliri
Kripë
Përgatitja:
Në një tenxhere hidhni ujë dhe kripë dhe vëreni të vlojë. Në momentin që vlon, shtoni spagetit.
Ndërkohë, në një tigan të thellë , hidhni 4 lugë gjelle vaj ulliri dhe acuget. Vëreni në zjarr mesatar dhe shtypini acuget me lugën e drurit derisa të shpërbëhen.
Shtoni hudhrat dhe lërini të skuqen për 1-2 minuta , sa të lëshojë aromën.
Shtoni ullinjtë , kaperin dhe farat e specit djegës(sipas dëshirës suaj).
Pasi t’i skuqni për 1 minutë, shtoni domatet dhe borzilokun e grirë hollë. Lëreni në zjarr mesatar derisa të vlojë. Rregullojeni më kripë sipas shijes suaj.
Ndërkohë kulloni makaronat , të cilat duhet të jenë “al dente” , shtojini në tiganin ku është salca , bashkë me 1 garuzhde ujë nga ai i makaronave.
Servirini të ngrohta, me pak borzilok të freskët dhe pak djathë Pecorino ose Parmigiano, nëse doni.
Ju bëftë mirë!